Frétt

13.06.2018|

Valitor varar við svikapóstum

Valitor vill ítreka viðvörun við svikapóstum sem sendir hafa verið í nafni Valitor til almennings, nú síðast í dag. Efni póstanna er fölsk tilkynning um að korti viðkomandi hafi verið lokað og til þess að opna þau að nýju þurfi að gefa upp korta­upp­lýs­ing­ar.

Fólki er eindregið ráðlagt að opna póstana ekki, smella ekki á hlekkinn sem fylgir með og gefa ekki undir neinum kringumstæðum upp kortaupplýsingar. Best er að eyða póstinum strax.

Hafi fólk brugðist við slíkum póstum er brýnt að hafa samband við þjónustuver Valitor.

Valitor biður aldrei um kortaupplýsingar í tölvupósti.

Vert er að taka fram að Valitor hefur ekki orðið fyrir tölvuárás heldur er um að ræða svikapósta til almennings.

Nokkur heilræði  til að forðast netsvik:
Skoðaðu tölvupóstinn vandlega. Ekki gera ráð fyrir að tölvupóstur sé ósvikinn þótt þú kannist við sendandann. Sumir netsvikapóstar eru auðþekkjanlegir en algengara er að netþrjótar noti haglega samansett skilaboð þar sem notast er við upplýsingar um einstaklinga og fyrirtæki sem eru aðgengilegar         á netinu í því markmiði að líkja eftir ósviknum tölvupósti.
Gættu þín sérstaklega á óvæntum tölvupósti þar sem farið er fram á persónulegar upplýsingar eða reikningsupplýsingar eða þú ert beðin(n) um að opna undarleg viðhengi eða senda peninga, jafnvel þótt pósturinn virðist vera frá manneskju og/eða netfangi sem þú kannast við.
Leitaðu upprunans ef þú ert í vafa. Ef þú færð grunsamlegan tölvupóst skaltu ekki smella á tengla eða opna viðhengi. Hringdu í sendandann eða farðu á opinbera vefsíðu viðkomandi til að ganga úr skugga um að pósturinn sé ósvikinn.

 

Til baka