Hraðbankar

VISA/MasterCard korthafar geta tekið út reiðufé í yfir 130 löndum um allan heim.

Lista yfir hraðbanka innanlands er að finna hjá: LandsbankanumArion banka,  Íslandsbanka og Sparisjóðnum.

Listi yfir hraðbanka erlendis

Korthafar eru beðnir að kynna sér öryggi hraðbanka neðar á síðunni

Leiðbeiningar um notkun hraðbanka

Fylgið leiðbeiningum hraðbankans um hvernig skuli bera sig að því að til eru margar útfærslur af hraðbönkum. Í flestum tilfellum er ferlið þetta: Setja kortið í hraðbankann, slá inn pinn númerið, velja upphæð, taka við peningunum og kvittun. Munið eftir að taka kortið aftur.

Pinn númer

Allar úttektir í hraðbönkum eða öðrum sjálfsafgreiðslutækjum og þegar örgjörvi er nýttur í stað segulrandar eru háðar notkun leyninúmers (PIN).

Allir bankar og sparisjóðir birta pinn númer í netbanka. Þeir sem ekki hafa aðgang að netbanka geta fengið pinn númerið endurútgefið hjá sínum viðskiptabanka/sparisjóði, ef mikið liggur við er hægt að koma í afgreiðslu Valitor, Dalshrauni 3 og fá númerið endurútgefið meðan beðið er. Gjald fyrir endurútgefið pinn númer er samkvæmt gjaldskrá hverju sinni. Einnig er hægt að fá pinn númerið sent heim gegn sama gjaldi.

Úttektir innanlands

Úttektir innanlands eru háðar reglum hvers útgefanda. Í gildi eru hámörk úttekta á dag og á úttektartímabili, mishá eftir tegund korta.

Úttektartímabil reiðufjár er jafnan frá 22. hvers mánaðar til 21. þess næsta. Kostnaður vegna úttekta er skv. gjaldskrá útgefanda.

Sömu reglur gilda um úttektarmörk plúskorta og annarra korta. Ekki er innheimt þóknun, einungis úttektargjald.

Úttektir erlendis

Úttektir erlendis eru háðar reglum hvers útgefanda. Í gildi eru hámörk úttekta á dag og á úttektartímabili, mishá eftir tegund korta. Úttektir erlendis eru háðar reglum í hverju landi fyrir sig. Úttektargjald er skv. gjaldskrá.

Öryggi hraðbanka

Þar sem notendaviðmót og umhverfi hraðbanka geta verið margvísleg er ekki unnt að taka saman gátlista sem tekur fullkomlega á öllum öryggisþáttum sem snerta notkun hraðbanka við allar mögulegar kringumstæður. Þess vegna er nauðsynlegt að viðskiptavinir hraðbanka kynni sér vel umhverfi hraðbanka og þær margvíslegu aðferðir sem eru til staðar til að gæta öryggis við notkun þeirra.

Gátlisti fyrir notkun hraðbanka

  • Vertu á varðbergi gagnvart grunsamlegri hegðun ókunnugra kringum hraðbankann.
  • Ef þú verður var við grunsamlega hegðun skaltu ekki nota hraðbankann heldur snúa frá og finna annan eða prófa síðar.
  • Ef þú tekur út peninga, settu þá strax til hliðar ofan í vasa eða veski. Ekki telja peningana fyrir framan hraðbankann.
  • Aldrei þiggja aðstoð ókunnugra við notkun hraðbankans, spyrðu frekar bankann um aðstoð.
  • Ekki láta kortið þitt í hendur ókunnugra þegar þú notar hraðbanka.
  • Legðu pinn númerið þitt vel á minnið og ekki bera á þér minnisblöð þar sem pinn númerið er skrifað niður. Ekki láta neinn fá pinn númerið þitt (hvorki ókunnuga, bankastarfsmenn, lögreglu o.s.frv.). Öryggi pinn númersins er á ábyrgð korthafa.
  • Vertu á varðbergi gagnvart aðilum sem eru að reyna að sjá innslátt pinn númers við hraðbanka og gættu þess að enginn geti séð innslátt pinn númersins.
  • Settu aðra hönd þína yfir takkaborðið og notaðu sem skjöld fyrir hina höndina sem slær inn pinn númerið.
  • Notaðu líkama þinn til að byrgja ókunnugum sýn þegar þú slærð inn pinn númerið.
  • Haltu vel utan um kvittanir fyrir aðgerðum í hraðbanka og ekki henda þeim við hraðbankann. Berðu saman kvittanir við úttektir þínar sem koma fram á reikningsyfirliti.
  • Hafðu samband við þinn banka/sparisjóð eða Valitor ef vandamál koma upp við aðgerðir eða úttektir úr hraðbanka.
  • Ekki þiggja aðstoð þriðja aðila sem býðst til þess að hringja fyrir þig í þjónustuver.
  • Tilkynntu umsvifalaust þjónustuveri banka, sparisjóðs eða kortafyrirtækis um stolin eða týnd kort.