Öryggismál kortaútgáfusviðs

Við bendum korthöfum á að gæta alltaf fyllstu varúðar í netviðskiptum. Netsvik hafa færst í vöxt á undanförnum misserum og betra að hafa varann á.

Bara á þessu ári (2018) hafa komið upp nokkur dæmi um svokallaðar netárásir þar sem póstar eru sendir í nafni fyrirtækis (t.d. Valitor) þar sem beðið er um viðkvæmar upplýsingar svo sem kortnúmer og öryggisnúmer. Oft eru líka hlekkir í slíkum póstum sem korthafi er beðinn um að smella á og gefa þar upp kortnúmer og öryggisnúmer.

Korthöfum er eindregið ráðlagt frá því að opna slíka pósta, alls ekki smella á hlekkinn sem fylgir með og gefa ekki undir neinum kringumstæðum upp kortaupplýsingar. Best er að eyða póstinum strax.

Hafi fólk brugðist við slíkum póstum er brýnt að hafa samband við þjónustuver Valitor.

Valitor biður aldrei um kortaupplýsingar í tölvupósti.

Nokkur heilræði  til að forðast netsvik:

  • Skoðaðu tölvupóstinn vandlega. Ekki gera ráð fyrir að tölvupóstur sé ósvikinn þótt þú kannist við sendandann. Sumir net svikapóstar eru auðþekkjanlegir en algengara er að netþrjótar noti haglega samansett skilaboð þar sem notast er við upplýsingar um einstaklinga og fyrirtæki sem eru aðgengilegar á netinu í því markmiði að líkja eftir ósviknum tölvupósti.
  • Gættu þín sérstaklega á óvæntum tölvupósti þar sem farið er fram á persónulegar upplýsingar eða reikningsupplýsingar eða þú ert beðin(n) um að opna undarleg viðhengi eða senda peninga, jafnvel þótt pósturinn virðist vera frá manneskju og/eða netfangi sem þú kannast við.
  • Leitaðu upprunans ef þú ert í vafa. Ef þú færð grunsamlegan tölvupóst skaltu ekki smella á tengla eða opna viðhengi. Hringdu í sendandann eða farðu á opinbera vefsíðu viðkomandi til að ganga úr skugga um að pósturinn sé ósvikinn.