Neyðarþjónusta

SOS International neyðarþjónustan er hluti af ferðatryggingu kreditkortsins. Hvar og hvenær sem er veitir SOS International korthöfum aðgang að margvíslegri neyðarþjónustu og læknishjálp. SOS International veitir í megindráttum rétt til þrenns konar aðstoðar án aukakostnaðar.

• Útvegar læknishjálp.
• Annast sjúkraflutninga, ferðalög vandamanna og flutning jarðneskra leifa heim ef korthafi lætur lífið erlendis.
• Veitir tímabundna fyrirgreiðslu vegna sjúkrakostnaðar.

Þegar korthafi lendir í slysi eða veikist er best að hafa samband beint við SOS International sem gefur ráð um hvað gera skuli.

Þeir sem ekki treysta sér til að skýra vanda sinn á erlendu tungumáli geta haft samband við tryggingafélag sitt á skrifstofutíma eða Valitor utan skrifstofutíma.

Sérstök neyðarkort eru gefin út og fylgja viðkomandi tegund greiðslukorts við útgáfu. Á þeim eru tilgreind gjaldfrí símanúmer viðlagaþjónustu fyrirtækjanna auk annarra mikilvægra símanúmera sem tengjast VISA greiðslukortum.

Ný neyðarkort er unnt að fá send frá Valitor hvenær sem er.

Þjónustuver Valitor er opið allan sólarhringinn, allt árið. Símanúmerið er +354 525 2000.