Valitor logo

Viðar hættir sem forstjóri Valitor

Fréttatilkynning 26. mars 2020

Viðar Þorkelsson, forstjóri Valitor hefur komist að samkomulagi við stjórn félagsins um að hann láti af störfum eftir áratug við stjórnvölinn. Viðar mun láta af störfum um næstu mánaðarmót en verður áfram stjórn félagsins til ráðgjafar næstu mánuði.

Herdís Fjeldsted, formaður stjórnar Valitor, tekur tímabundið við starfi forstjóra. Hún mun gegna starfinu þar til stjórn hefur ráðið forstjóra til frambúðar. Þór Hauksson, varaformaður stjórnar, tekur við sem stjórnarformaður á meðan Herdís sinnir starfi forstjóra.

Viðar Þorkelsson, forstjóri Valitor:

„Ég hef stýrt þessu góða fyrirtæki í viðburðarík 10 ár og verkefnin hafa verið fjölbreytt og krefjandi. Ég hef tekið þátt í mikilli uppbyggingu og markaðssókn Valitor erlendis og nú síðast farið fyrir gagngerri endurskipulagningu á starfseminni í góðu samstarfi við stjórn félagsins. Valitor er fjárhagslega sterkt fyrirtæki með öflugt starfsfólk og því vel búið til að takast á við áskoranir framtíðarinnar. Ég tel þetta því vera rétta tímann til að stíga til hliðar og fela öðrum að taka við keflinu. Þakkir til alls þess góða fólks sem ég hef starfað með á þessum áratug og óska ég félaginu og starfsfólki þess alls hins besta í framtíðinni.“

Valitor hefur tekið miklum stakkaskiptum á þeim tíu árum sem Viðar hefur verið við stjórnvölinn. Framlag Viðars hefur verið mikilvægt við að leiða fyrirtækið í gegnum margvíslegar krefjandi áskoranir á undanförnum árum. Nýverið náðust mikilvægir áfangar í umbreytingu félagsins þegar viðamiklum skipulagsbreytingum var hrint í framkvæmd undir hans forystu. Stjórn félagsins þakkar Viðari gott samstarf, ekki síst við endurskipulagningu félagsins á síðustu mánuðum og óskar honum velfarnaðar.