Spurningar og svör

Hvert á ég að snúa mér ef ég tel að villa sé í VISA-reikningi mínum?

Korthafa ber að snúa sér til viðskiptabanka/sparisjóðs síns og fylla út skriflega kvörtun varðandi viðkomandi færslu og best er að hann komi með öll gögn máli sínu til stuðnings, þ.e. sölunótur, kvittanir eða samninga.

Hvernig er gengisumreikningi háttað?

Erlendar færslur korthafa eru umreiknaðar beint úr kauplandsmynt yfir í íslenskar krónur á því gengi sem í gildi er hjá VISA International þann dag sem færslan berst frá seljanda og er innheimt hjá VALITOR. Upplýsingar um gengi helstu gjaldmiðla í viðskiptum eru uppfærðar daglega.

Ég fékk tölvupóst frá VISA um að senda inn kortnúmer og PIN-númer.

Alls ekki svara þessu! Þessi tölvupóstur kemur ekki frá neinum aðila sem tengist VISA, þótt það geti litið svo út. Ekki láta blekkjast þótt orðið "visa" standi einhvers staðar í netfanginu. Einnig hefur orðið vart við lævísa tilraun á netinu til að blekkja einstaklinga til að gefa upp kortnúmer sitt, gildistíma og PIN-númer á heimasíðu sem líkist heimasíðu VISA. PIN-númer á einungis að nota í hraðbönkum eða öðrum sjálfsafgreiðslubúnaði og er óheimilt að senda í tölvupósti eða láta öðrum í té.

Hvað er ég með háa heimild og hvernig get ég fengið hana hækkaða?

Upplýsingar um úttektarmörk korthafa er að finna á mánaðarlegri reikningsútskrift hans. Sé hún ekki við höndina getur korthafi haft samband við banka/sparisjóð sinn til þess að fá frekari upplýsingar og eins ef hann óskar eftir að fá heimild sína hækkaða.

Get ég fengið kort opnað á ný, sem ég tilkynnti glatað/stolið kort?

Kort er aldrei opnað á ný símleiðis af öryggisástæðum. Korthafi þarf að snúa sér til viðskiptabanka/sparisjóðs síns og skrifa undir beiðni um enduropnun. Um leið tekur hann ábyrgð á öllum færslum sem kunna að hafa verið gerðar á meðan kort hans var skráð sem glatað/stolið.

Hvað á ég að gera til að fá nýtt kort í staðinn fyrir glatað/stolið?

Korthafi á að snúa sér til viðskiptabanka/sparisjóðs síns innan 3ja daga frá því kort var tilkynnt glatað/stolið, staðfesta kortmissinn skriflega og óska í leiðinni eftir nýju korti.

Er hægt að hafa mörg Kortalán/Raðgreiðslur í gangi í einu?

Já, en það eru úttektarmörk korthafa og eftirstöðvar Kortalána / Raðgreiðslna hverju sinni sem ráða því hve mörg Kortalán / Raðgreiðslur er hægt að hafa í gangi í einu.

Er lágmarksupphæð á afborgun Kortalán / Raðgreiðslu?

Já, lágmarksafborgun á mánuði á hverja Raðgreiðslu er 500 kr.

Er hægt að greiða upp Kortalán /Raðgreiðslubréf?

Já, það er hægt. Tilkynna þarf slíka ósk til Fyrirtækjalausna VALITOR fyrir 15. dag mánaðar svo hægt sé að ganga frá uppgreiðslu á næsta VISA reikning korthafa.

Er hægt að færa Kortalán / Raðgreiðslu af einum korthafa yfir á annan?

Nei, það er ekki hægt því að korthafinn sem skrifaði undir Kortalán / Raðgreiðslubréfið er alltaf ábyrgur fyrir greiðslu þess.

Hvernig get ég fengið uppgefið PIN-númerið mitt?

Korthafi getur fengið PIN-númerið endurútgefið með því að hafa samband við banka sinn eða sparisjóð og ef mikið liggur við er hægt að koma í afgreiðslu VALITOR, Laugavegi 77 og fá númerið endurútgefið meðan beðið er. Ef þú vilt fá PIN-númerið sent heim til þín getur þú pantað það hér.

Fæ ég sama PIN-númerið aftur?

Já, ef  þú hefur ekki skipt um kortnúmer.

Er hægt að sækja um VISA-kort beint hjá ykkur?

Nei, öll VISA kort eru gefin út af bönkum og sparisjóðum og útgáfan er háð samþykki þeirra. Þú snýrð þér því til viðskiptabankans þíns.

Ég varð fyrir tjóni á ferðalagi, hvert sný ég mér?

Tvö tryggingarfélög tryggja VISA korthafa. Sjóvá tryggir viðskiptavini Íslandsbanka og VÍS (Vátryggingafélag Íslands) tryggir viðskiptavini Arion banka, Landsbanka, MP banka og sparisjóðanna. Starfsfólk tryggingarfélaganna metur tjón og greiðir út bætur skv. skilmálum. Korthafar eru vinsamlega beðnir að snúa sér beint til tjónadeildar tryggingarfélaganna með frekari spurningar, Sjóvá 440 2000 og VÍS 560 5000.